Ikinadismaya ng ilang mga estudyante ang kawalan ng konsultasyon ng administrasyon sa pagtanggal ulit nito ng reading break sa pinal na 2025-2026 academic calendar ng UP Diliman.
Inaprubahan ang naturang pagtanggal noong Mayo 9 nang pirmahan ang opisyal na academic calendar sa susunod na taong panuruan.
Nilayon ng reading break na makapaglaan ng sapat na oras ang mga estudyante at guro ng unibersidad para sa pangangalaga ng kanilang kalusugan noong magsimula ang pandemya. Ngunit taong panuruan 2023–2024 pa ito huling inimplementa dahil sa desisyon ng University Council, na binubuo ng tsanselor at mga guro, na tanggalin ito noong Mayo 20, 2024.
“Disappointing but not surprising ang kawalan ng reading break ngayong academic year. I believe ito yung pinakakailangan pa rin pagtuunan ng pansin sa bagong academic calendar,” pahayag ni Student Regent Francesca Duran sa Collegian.
Kahit halo ang opinyon ng mga estudyante ukol sa pagtanggal ng reading break sa academic calendar, pabor pa rin ang ilan dito, base sa inisyatibang Iskonsultasyon ng University Student Council noong Marso.
“[Sa] pag-iikot sa different sectors ng students and organizations, mapapahayag talaga na naging mahalaga ang papel ng reading break para magkaroon ng genuine na rest ang mga estudyante. Pero at the same time, they also raised na yung nangyayaring reading break ay hindi rin as conducive as possible,” bigyang-diin ni Chairperson-elect Joaquin Buenaflor, na ngayo’y USC basic student services councilor, sa On The Spot ng UP Radio Circle, Mayo 9.
Ngunit sa kabila nito, walang ginawang konsultasyon ang administrasyon sa mga estudyante sa pagpapatanggal ng reading break.
Pasanin para sa ilang mga estudyante, kabilang si Justine, first-year BS Hotel, Restaurant, and Institution Management, ang kawalan ng reading break.
“Labis na nakakalungkot dahil bilang estudyante na kailangan ding magpahinga, nawalan kami ng kahit unting araw na magsisilbi sanang pahinga sa halos araw-araw na pag-aaral,” saad ni Justine.
Problema sa mental health ang isa pa sa mga dinadaing na agam-agam ng mga estudyante kasunod ng hindi paglalagay ng reading break sa gitna ng bawat semestre.
Para kay Athena, first-year BS Psychology student, nagdudulot ang kawalan ng reading break sa dire-deretsong paggawa ng mga akademikong gawain na nagreresulta sa pagka-burnout ng mga estudyante pagdating sa kalagitnaan ng semestre batay sa karanasan sa kasalukuyang academic year.
“Nadismaya ako nung wala ulit reading break kasi hindi nagkakaroon ng maiksing breather ang mga estudyante at ng sariling oras para pagtuunan ang sarili at magpahinga,” daing niya.
Napansin din ng mga estudyante ang mas maagang pasok sa susunod na taong panuruan na Ago. 11 kaysa sa nakaraang taon na nagsimula noong Ago. 20.
Nakabatay ang desisyon ng UP Diliman Executive Committee na agahan ang pasok sa kasalukuyang Revised UP Code, kung saan nakasaad na Agosto dapat magsisimula ang unang semestre ng taong panuruan, pahayag ng Office of the Vice Chancellor for Academic Affairs (OVCAA) sa Collegian.
Isang magandang hakbang para kay Student Regent Duran ang unti-unting pagpapaaga sa simula ng pasok dahil oportunidad ito upang muling bisitahin kung anong buwan ba dapat nagsisimula ang klase.
Pero kahit mas maaga na ang pasukan, may panghihinayang pa rin ng ilang mga estudyante, tulad ni Justine na kukuha ng kurso sa midyear, dahil mas uunti daw ang araw na nakalaan para sa kanilang bakasyon para pagtuunan ang pamilya at sarili.
Bagaman ito ang naging pasya ng administrasyon ng UP Diliman sa kasalukuyan, nakikiusap pa rin ang ilang mga estudyante na ikonsidera ang kanilang mga saloobin at hinaing para sa susunod na taong panuruan.
“Sana man lang ay pakinggan yung kahilingan ng mga estudyante na magkaroon ng reading break dahil hindi lang naman ito para sa amin, pero nagsisilbi na rin itong pahinga na rin para sa mga guro at faculty,” hiling ni Athena. ●
Unang nailathala sa isyu ng Kulê noong ika-27 ng Mayo 2025.
