“Walang bansa ang tunay na malaya hanggang mayroon itong bilanggong pulitikal,” paalala ni Fides Lim, tagapagsalita ng Kapatid – Families of Political Prisoners, sa isang panayam ng Collegian. Ngunit nang ikulong si Reina Mae Nasino, isang bilanggong pulitikal, hindi lang kalayaan ang ipinagkait ng estado sa kanya. Matatandaang nasawi si Baby River, anak ni Nasino, matapos ipagkait ang kalingang kailangan nito mula sa ina.
Higit isang taon na ang lumipas ngunit masakit pa rin para kay Marites Asis, ina ni Nasino, na alalahanin ang sinapit ng anak at apo. Nang makapanayam si Asis tungkol sa eleksyon, ipinakilala niya ang sarili bilang inang patuloy na lumalaban para sa hustisya ng kanyang apo’t anak. Ngayong eleksyon, ito ang patuloy niyang ipapanawagan at igigiit sa mga kandidatong nangangakong manungkulan para sa bayan.
*
Kulê: Kumusta na ang pang-araw-araw na buhay ninyo ng inyong anak mula nang pumanaw si Baby River?
Asis: Hanggang ngayon, ramdam na ramdam ko pa rin yung pinaranas nila sa amin. Hindi naman basta-basta makakalimutan ang lahat. Pero hindi rin dito natatapos ang lahat, hindi ko pa nakukuha yung hustisya para sa anak at apo ko. Hindi makatarungan yung ginawa nila sa anak ko. Wala silang karapatang bastusin yung kalagayan ng anak ko. Ang isang aktibista, kahit kailan hindi sila matatawag na terorista. Sila yung mulat at lumalaban sa mga hindi tamang pagkilos ng gobyerno. Nawala ang karapatan niya bilang tao, ina, at babae.
Kulê: Liban sa tuluyang paglaya ng mga bilanggong pulitikal, ano-ano ang bitbit niyong panawagan at adyenda para sa mga tumatakbong kandidato ngayong eleksyon?
Asis: Ang panawagan ko sa mga tumatakbong kandidato ay huwag na nilang ipikit nang tuluyan ang mga mata nila sa nangyayari sa mga political prisoner. Pakinggan nila kung anong ipinaglalaban ng mga katulad ni Reina. Tingnan nila kung sino talaga yung tunay na may kasalanan, at tumugon sila sa ganitong mga problema ng bansa. Aktibista sila, hindi terorista, lumalaban lang sila para sa karapatang pantao.
Kulê: Paano makakatulong ang darating na eleksyon upang matigil na ang mga ilegal na pang-aaresto at panggigipit sa mga aktibista sa bansa?
Asis: Sana yung mga tumatakbo, sila mismo yung gumampan at manguna sa pagtigil ng mga pang-aaresto sa mga political prisoner, tulad nung sa anak ko. Nananawagan ako sa mga tumatakbo na sila na mismo yung kumilos at magpatupad na pigilan na ang mga katulad ng NTF-ELCAC dahil wala talaga silang naitutulong para sa mga Pilipino.
Kulê: Tuwing kampanya ay palaging may pagbitiw ng mga pangako ang mga kandidato, paano natin kikilatisin kung sino ang tunay na gagampan sa mga pangako at plataporma pagkatapos ng eleksyon?
Asis: Wala tayong seguridad sa mananalo sa eleksyon, at kung gagampanan talaga nila [ang mga ipinangako]. Pero kung sino man ang manalo, sa oras na hindi nila tupdin ang mga panawagan natin, dapat lagi nating babantayan at ipapaalala sa kanila ang mga salitang binitawan nila.
Kulê: Ano ang mensahe niyo para sa mga kandidato ngayong eleksyon?
Asis: Wag na sana pang dumami pa ang mga political prisoners dito sa bansa. Panahon na para tigilan na nila ang marahas na pang-aaresto sa mga inosente. Dapat ang tutukan ng gobyerno ay yung mga tunay na may kasalanan, yung nagnanakaw, at nagkakasala talaga sa bansa natin. ●
