Ang pakikibaka natin para sa ganap na kalayaan ang nagbibigkis sa ating mga inaapi.
Ngayong araw ni Bonifacio, umaalingawngaw sa mga kalsada ang mga panawagan ng mga manggagawa: nakabubuhay na sahod, ligtas na kondisyon ng paggawa, at hustisya para sa mga pinaslang ng estado. Kasama sa isinisigaw ng sektor ang pagpapalaya ng mga Palestino mula sa gapos ng Israel at Estados Unidos (US).
Kung may ipinapahiwatig man itong pagkilos, ito ay ang pakikiisa ng mga manggagawa sa laban ng mga kapwang pinagkaitan din ng kalayaan. Sapagkat ang danas natin ay hindi malayo sa nasasaksihan natin sa Gitnang Silangan at iba pang rehiyon sa daigdig, nakikita ng mga manggagawa na ang ugat ng ating paghihirap ay iisa lang: mga mapagsamantalang imperyo na nagkukumpas ng mga digmaan.
Sa paghahangad ng US na mapalawak ang kanilang kapangyarihan sa iba-ibang rehiyon at makontrol ang yaman nito, susi ang kanilang pakikipagsabwatan sa mga mapagsamantalang estado. Buhat ng pag-igting ng atake ng Israel sa Gaza mula noong ika-7 ng Oktubre, umabot na sa higit 14,000 buhay na ang nasawi. Sa likod ng layon ng Israel ng ganap na okupahin ang Palestine, ang hangarin ng US na mapalawak ang kontrol nito sa rehiyong mayaman sa natural na langis.
Sa ganitong iskema rin isinasadlak ang bansang Congo kung saan patuloy na lumulubha ang paglabag sa karapatang pantao kamakailan. Bagaman hitik sa likas na yaman, nababaon ang 62 porsyento ng mamamayan sa kahirapan buhat ng lubos na pananamantala at pangangamkam sa lupang tinubuan ng 6.9 milyong mamamayan para sa mga minahan ng cobalt na dinarambong ng mga imperyalista. Hindi rito nalalayo ang danas natin sa Pilipinas. Pinapakinabangan ng mga banyagang korporasyon ang murang lakas-paggawa ng mga Pilipino at ang yamang taglay ng mga lupain at karagatan ng bansa.
Malinaw sa sistemang ito na mga mangggagawa at mamamayan ang pinakadehado. Taktika ang karahasan upang protektahan ang sistemang mapaniil. Kung gayon, hindi na kagulat-gulat ang pagtutulak, pagsusuporta, at pagpopondo ng US sa mga digmaan at iba-ibang anyo ng karahasan. Sa 75 na taong okupasyon at henosidyo ng Israel sa Palestine, tinatayang umabot ng USD124 bilyong military at defense aid mula 1946 ang natanggap ng Israel mula US.
Ganito rin ang nasasaksihan natin sa sariling bayan kung saan ni-re-red-tag, inaaresto, at pinapaslang ng mga pulis at militar ang mga lider-manggagawa gamit ang armas at intelihensyang kalakhang sinusuportahan ng US at Israel. Laganap ang mga kaso ng pagpaslang sa mga unyonista na umabot ng 72 ang bilang mula noong 2016, ayon sa Kilusang Mayo Uno. Kabilang dito si Jude Fernandez na binaril ng mga pulis sa loob ng kanyang tahanan noong ika-29 ng Setyembre.
Ngunit aasahan nitong mga mapagsamantalang rehimen at imperyo na ang kanilang patuloy na karahasan at pang-aapi ay mag-aanak ng nagkakaisang pwersang tutunggali sa kanilang pananamantala. Dahil kapwa pinoposas sa kondisyon ng kahirapan, ganap na kalayaan mula sa mga nakikinabang sa digmaan ang ipinaglalaban ng mga manggagawa at biktima ng karahasan sa mundo ngayon.
Bilang pakikiisa sa mga Palestino, hindi bababa sa 40 na mga pagkilos ng mga unyonista’t manggagawa ang naikasa sa iba-ibang panig ng daigdig, ayon sa Tambisan sa Sining. Mula sa pagtatambol ng panawagang tigil-putukan, pag-boycott sa mga produkto at establisyementong sumusuporta sa Israel, hanggang sa paghaharang ng paghahatid ng materyales sa Israel, puspusang ginagamit ng mga manggagawa ang iba-ibang anyo ng pagpoprotesta upang pilayin ang makinang pandigma.
Malinaw na nasa kolektibong lakas ng mga manggagawa at kapwa inaapi ng mundo matatagpuan ang pwersa ng pagbabago sa lipunan. Sapagkat sila’y esensyal na bahagi ng buong produksyon, ang kanilang pagbalikwas ay kayang makapagyanig ng mga gobyerno.
Hamon ngayon ang pagpapatuloy at pagpapalawak nitong mga pagkilos. Sa paglalim ng mga anyo ng pagbalikwas, aasahan ang pagtigil hindi lamang okupasyon ng Israel sa Palestine kundi ng kumpas ng mga imperyo kinokontrol ang mundo. Malulusaw ang kapangyarihan nitong mga mapagsamantalang bayan sa paglakas ng kaisahan ng mga manggagawa. Sa pwersa nila matatalunton ang landas ng tunay na paglaya. ●
