Matinding pagtutol mula sa sangkaestudyantehan ang sasalubong sa karahasang hinahasik ng estado. Sa pagsesemento ng administrasyon ni Pangulong Ferdinand Marcos Jr. sa presensya ng mga pwersa ng kapulisan at militar sa ating mga akademikong espasyo, wala nang puwang para maging pasibo.
Lumalakas na ang presensya ng mga militar sa loob ng mga eskwelahan at pamantasan sa Timog Katagalugan. Bunsod ito ng ipinasang resolusyon ng Regional Task Force to End Local Communist Armed Conflict (RTF-ELCAC) na magsagawa ng “national security seminars” sa rehiyon. Dito, maglulunsad ang RTF- ELCAC ng mga seminar na layon lamang mang-red-tag ng mga aktibista, lider-estudyante at mga progresibong organisasyon.
Malaon nang taktika ng estado ang pagpuntirya sa mga espasyong para sa malayang kaisipan at ang paggamit sa mga institusyong pang- edukasyon bilang instrumento ng panunupil. Hindi na maikukubli ang tunay na layunin ng RTF-ELCAC: Tugisin ang sinumang mangangahas na isiwalat ang mga pang-aabuso sa rehiyon, kitilin ang kritikal na pag-iisip ng kabataan. Hindi malayong magsisilbing balangkas ang resolusyon sa mas malalaking proyekto ng karahasan ng administrasyon.
Sa patuloy na pangangasangkapan ni Marcos ng whole-of-nation approach ni dating Pangulong Rodrigo Duterte, lulubha pa ang mga kaso ng paglabag sa karapatang pantao. Mag-aanak pa ng mga ganitong resolusyon ang ibang rehiyonal na balangay ng NTF-ELCAC sa iba-ibang bahagi ng bansa.
Batid ng estado na susi sa pagkamit ng ganap na kontrol sa sambayanan ang pagpilay sa kakayahan nating kumilatis at kumilos. Kung gayon, hindi na kagulat-gulat ang kagyat na pagtalima ng mga sangay ng Commission on Higher Education, Kagawaran ng Edukasyon, at Technical Education and Skills Development Authority ng rehiyon sa kumpas ng RTF-ELCAC.
Inaaasahan mula sa mga pamantasang itinuring na tagapagtanggol ng kalayaang akademiko ang aktibong pagdepensa sa espasyo ng mga estudyante. Sapagkat katungkulan, higit sa lahat, ng pambansang pamantasan na pagsilbihan ang sambayanan, nararapat lang na makiisa ito sa laban ng mga estudyante para sa de-kalidad at aksesibleng edukasyon.
Ngunit ang mismong pagpapahintulot ng administrasyon ng UP Los Baños sa RTF-ELCAC na maghasik ng kasinungalingan sa ilang klase ng National Service Training Program nito ay katumbas ng pagpayag nito na mapahamak ang mga estudyante. Ang bulag na pagtanggap sa resolusyong may kaparehong kalikasan ay pagtalikod sa mandato ng pamantasan.
Sa kabila ng mga ulat ng pagmamanman ng mga pulis at militar sa mga estudyante, nakikipag-ugnayan pa ang UP sa Philippine National Police simula noong nakaraang taon upang makipagtulungan umano sa pag-unlad ng mga proyekto at pananaliksik sa pamantasan.
Totoong minsang nanindigan ang pamantasan laban sa pan-re-redtag sa mga estudyante, guro, at kawani nito. Gayunpaman, kahingian pa rin sa administrasyon na aktibong isakatuparan ang mga hakbang na pangalagaan ang akademikong kalayaan ng komunidad tulad ng pag- institusyonalisasyon ng Committee on the Promotion of Human Rights and Academic Freedom.
Nagtatakda ng balangkas ng karahasan ang patuloy na pagiging kimi ng pamantasan sa mga panghihimasok ng estado. Nasa yugto na tayo ng ibayong paniningil sa mga pamantasan ng nararapat nitong tungkulin. Ngayong tumitindi ang mga kaso ng paglabag sa karapatang-pantao, marapat nating igiit na walang puwang sa ating mga pamantasan ang mga pwersang kumikitil sa ating mga demokratikong karapatan. ●