Pagkatapos ng hell week, linggo kung kailan sunod-sunod ang paggaod sa mga pagsusulit, papel, defense, o kahit anong gawain sa klase, hindi nawawala sa plano ng mga estudyante ng UP ang inuman. Mataas man ang grado, pasang-awa, o “better luck next time,” nagkakaayaan pa rin ang magkakaklase, magtropa, o magka-org na magdiwang dahil sa wakas, nairaos na naman ang nakaka-stress na linggo.
Madalas matagpuan ang mga estudyanteng nag-iinuman noon sa Sarah’s, ang sikat na puntahan ng mga isko bago ang pandemya. Bungad ng Krus na Ligas, makikita ang mga nakahanay na plastik na upuan at lamesa na nagsisilbing pahingahan ng mga isko. Ito ang klase ng inuman na nakagisnan sa Sarah’s–payak at para sa mga magdamagang usapan.
Sa muling pagbabalik-buhay sa unibersidad matapos ang lockdown, mistulang nag-iba ang tahak ng mga paa ng mga estudyanteng naghahanap ng kasangga sa serbesa. Sa halip na papuntang C.P. Garcia, dumadagsa na ang mga motor at kotse papunta sa kalsadang nasa kanto lang nito: ang Katipunan.
Ang mga hanay ng inuman sa kahabaan ng Katipunan, o “Katip,” ay ang bagong dinadayo ng mga iskolar ngayon. Uso na rin ang “bar hopping” o ang paglilipat ng lugar na maiinuman matapos magsaya sa isang bar. Sumikat ang mga inuman sa Katip sa mga estudyante bunsod ng pagpapaingay nito sa social media, partikular na sa Tiktok at X (dating Twitter). Ayon sa mga post, bahagi na raw ito ng buhay UP na dapat masubukan ng mga isko.
Isa sa mga inuman sa Katip ang Pop Up na madaraanan sa harap ng Katipunan jeepney terminal. Mala-food hub ang estilo ng Pop Up, nakahilera ang iba-ibang tindahan ng mga pagkain at alak. Katulad ng Sarah’s, al fresco din ang Pop Up. Ngunit di tulad ng mga tahimik na inumang nakagisnan noon, maingay at puno ng sayawan ang inuman sa Katip.
Bagaman nag-iba ang klase ng inuman na tinatangkilik ngayon ng mga estudyante, mapapansing paraan pa rin ito ng pagpawi ng stress matapos ang isang linggo o buwan ng sunod-sunod na pag-aaral at trabaho. Dito, napaparamdam sa atin na hindi tayo mag-isa sa paglalakbay sa kolehiyo, kaagapay din natin ang nakakasalumuha sa silid at katrabaho sa organisayon.
Mahalaga ang determinadong pagsuong sa pag-aaral at trabaho bilang mga iskolar ng bayan, ngunit walang masama sa saglit na pagpapahinga. Lalo na kung sa mga tagpong ito, hindi tayo nag-iisa at may karamay sa lango ng hirap at saya ng buhay sa UP. ●