Malaon nang bahagi ang kabataan, partikular na ang mga estudyante, sa mga pagkilos na ikinakasa ng iba-ibang sektor ng lipunan. Sa pagtindi ng pang-aatake ng Israel sa mga Palestino, tumitindig ngayon ang mga estudyante para sa paglaya ng mamamayan ng Palestine.
Nitong mga nakaraang buwan, naging saksi ang buong mundo sa paglaganap ng mga student encampment sa Estados Unidos (US) bilang pagtunggali sa henosidyo ng estado ng Israel sa mga Palestino. Sinundan ito ng maraming protesta sa mga bansa tulad ng Lebanon at Jordan, na minsan ding nakaranas ng opresyon sa mga mananakop, matapos pahintulutan ng pamunuan ng mga unibersidad ang marahas na pagbuwag ng kapulisan sa mga Kampuhan. Sa US, higit 2,900 estudyante na ang inaresto ng kapulisan.
Malinaw ang tunguhin ng mga Kampuhan ng mga estudyante: Itulak ang kanilang mga unibersidad na bawiin o putulin ang anumang suporta sa Israel at mga kumpanyang konektado rito.
Esensyal na bahagi ang pagkilos ng mga estudyante sa mga unibersidad. Katungkulan, higit sa lahat, ng mga akademikong institusyon na hubugin ang kritikal na pag-iisip ng kabataan at protektahan ang kanilang kalayaang pang-akademiko na kumilos at magpakilos. Naisasapraktika ang gayong diwa sa matagumpay na pagkilos ng mga estudyante na iudyok ang kanilang mga unibersidad na putulin ang kanilang koneksyon sa Israel.
Gayundin, marapat na makiisa ang UP sa pagpapalawak ng pagkilos ng mga estudyante sa iba-ibang sulok ng mundo. Mula nang maganap ang opensiba ng Israel sa Gaza noong Oktubre 2023, puspusang naglunsad ng mga mobilisasyon at educational discussion ang mga estudyante mula sa maraming kampus ng bansa. Ang pagtindig ng UP kasama ng mga estudyante ang magtatambol ng ating mga panawagan mula sa mga unibersidad hanggang sa mas malawak na komunidad sa labas ng bansa.
Ngunit maisasakatuparan lamang ito kung maninindigan ang pamantasan para sa kaligtasan ng sangkaestudyantehan. Mula sa mga student encampment sa mundo hanggang sa mga pagkilos sa embahada ng US at Israel sa Pilipinas, tanging dahas ang tinugon ng mga pwersa ng estado sa kabataan. Ano pang maaasahan sa pamahalaang bumubuntot sa kumpas ng kaalyadong US kundi ang pagkiling sa interes ng mga bansang inaasahan nito para sa seguridad ng sariling bayan. Pagkat malaon nang sinasagot ng dahas ang pagkilos ng kabataan, kagyat na kahingian sa UP na protektahan nito ang mga estudyante.
Batid na kayang isiwalat ng kritikal na pag-iisip ng kabataan ang mga krimen ng estado, sinisikil ng pamunuan ang pagkilos ng sangkaestudyantehan. Upang tunggaliin ito, dapat na magsilbing espasyo para sa malaya at kritikal na kaisipan ang UP.
Isang hakbang pasulong sa pakikiisa sa pagkilos ng mga estudyante ang paghayag ng University Council, na binubuo ng mga propesor at guro, sa kanilang suporta sa Palestine. Ngunit hindi rito natatapos ang tungkulin ng UP. Bilang pambansang pamantasan, malaki ang gampanin ng UP sa panghihikayat sa publiko na makilahok sa diskurso tungkol sa opresyon na nararanasan ng mga sinasakop na bansa—kabilang na ang Pilipinas at Palestine. Sa pagmomobilisa ng pamantasan sa mga estudyante, matutunggali ang mapanlinlang na imahe na ipinipinta ng estado ng ibang bansa sa mga student encampment na sagka umano sa kaligtasan ng mga miyembro ng unibersidad.
Ngunit kung may sinasabi ang mga pangyayari na ito, mula sa mga mobilisasyon hanggang sa pagtatayo ng Kampuhan ng mga estudyante sa maraming sulok ng mundo, lalo lamang nag-aalab ang pagkilos ng kabataan sa kabila ng panggigipit ng estado. Sa patuloy na pagtindig ng maraming estudyante para sa Palestine, tumitindi ang pagmamatyag ng maraming bansa at institusyon sa Israel at sa iba pang kaalyado nito tulad ng US.
Sentro sa layuning mapanagot ang Israel at US ang patuloy na pagpapaingay ng pamantasan at mga estudyante nito sa karahasang nararanasan ng mga Palestino. Dahil higit sa pagkatuto sa loob ng mga silid-aralan, mahalaga ang pakikiisa ng kabataan sa mas malawak na hanay ng mga sektor hindi lang sa labas ng pamantasan, kundi maging sa labas ng bansa.
Nasa yugto na tayo ng tuluyang pagbalikwas. Walang anumang pagtinag o pagbuwag ang makagagapi sa tindig ng kabataang pursigidong kumalas mula sa pagkakagapos ng mga mapangsikil na estado. ●