“Asking the big questions, solving the problems of the nation and the world,” ang bisyon na inilatag ni Angelo Jimenez nang kumandidato siya bilang ika-22 pangulo ng UP. Sa unang taon ng kanyang pamumuno, kinapos si Jimenez na sundan ang grandiyosong simulaing ito para sa UP. Maging ang mga suliranin na hinihinging kagyat na matugunan ay naiwan din sa kawalang-katiyakan.
Mahalaga ang unang taon ni Jimenez upang suriin ang kalagayan ng bawat sektor sa UP at bumalangkas ng lapat na tugon sa mga matutukoy na suliranin. Pero bigong maiahon ni Jimenez ang UP mula sa mga problemang minana nito sa dating administrasyon dahil wala pa itong nabuong mahigpit na relasyon sa komunidad.
Liban sa mailap niyang pagharap sa mga panawagan ng mga sektor at kakapusan sa konsultasyon, higit na lumitaw sa kanyang unang taon ng pakikisalamuha sa mga sektor ng UP ang kawalan ng direktang pagtugon sa mga problemang bumabagabag sa pamantasan.
Bagaman nakapagtamo ng dagdag benepisyo at pondo para sa mga manggagawa sa UP, nananatili itong salat para sa pagtugon sa matagal nang isyu ng kontraktuwalisasyon at mababang pasahod. Gayundin sa patuloy na pagtutulak sa komersyalisasyon ng UP, mawawalan ng tirahan at hanapbuhay ang mga empleyado at maliliit na negosyante sa nalalapit na pagtatapos ng DiliMall.
Hindi rin naging prayoridad ng pangulo ang pagsulong sa ipinangakong edukasyon na “student-centric.” Kasabay ng milyon-milyong budget cut para sa pagsusustena ng mga operasyon sa pamantasan at serbisyong pang-estudyante, kinaharap din ng mga estudyante ang panghihimasok at pang-aatake ng mga pwersa ng estado sa UP.
Kaugnay nito, binitbit ng mga organisasyon at sectoral regents ang kampanya sa pagbuo ng Committee on the Protection and Promotion of Academic Freedom and Human Rights para sa UP System na tutugon sa mga kaso ng paninikil sa mga estudyante. Gayunman, siyam na buwan mula nang ipanawagan ng mga sektor ang institusyunalisasyon ng komite, hindi pa rin ito isinasakatuparan ng administrasyon.
Sumasalungat sa mithiin ni Jimenez para sa UP—yaong maging tagalinang ang pamantasan ng progresibong dunong na sasagot sa sakit ng bayan—ang pananaig ng pamumuno na walang pagtutuon sa paghubog ng malaya at ligtas na espasyo para sa pag-iral ng kritikalidad.
Ipinangako pa naman ni Jimenez sa kanyang termino ang pagsasakatuparan ng mahalagang papel ng UP bilang pambansang unibersidad: ang makapaglingkod sa bayan. Minsang ipinamalas ng kanyang administrasyon ito sa pagkondena ng naging pambobomba sa Mindanao State University at paglagda sa pahayag ng pagkakaisa laban sa budget cut sa state universities and colleges.
Gayunpaman, maraming pinaglagpas na pambansang isyu ang administrasyon na higit ding nakaapekto sa loob ng unibersidad. Sa patuloy na pagratsada ng estado sa Public Utility Vehicle Modernization Program, wala pa ring kongkretong plano ang UP upang suportahan ang panawagan ng mga jeepney operator at driver sa pamantasan.
Kaya naman, kinakailangan ng matapang na tindig mula sa UP upang tunggaliin ang lantarang panunupil ng rehimeng Marcos sa mamamayan at mga tangka nitong patahimikin ang mga progresibong kampanya na mismong komunidad ng UP ang puspusang nagsusulong. Sa dumadaluyong na unos sa loob at labas ng unibersidad, anumang panata ng pag-unlad ay baog kung hahayaan na lamang ni Jimenez na tangayin ang UP sa mapaniil na pamamahalang bingi sa hinaing ng komunidad.
Bago mai-angat ni Jimenez ang UP sa nais na katanyagan sa daigdig, esensyal na masigurong nakalapat muna ang kanyang pamumuno sa pagtugon sa kagyat na kahingian ng mga sektor ng pamantasan. At unang hakbang dito ang mahigpit na pakikisangkot ng pangulo sa komunidad na pinagsisilbihan—nang sa gayon ay unti-unting ganap na mabigyan ng kalutasan ang mga matagal nang suliranin ng pamantasan at bayan. ●