Pagbobotohan ng mga estudyante ng College of Mass Communication (CMC) ngayong linggo sa pamamagitan ng isang referendum ang tuluyang pagkilala sa Tinig ng Plaridel (TNP) bilang opisyal na pahayagan ng mga mag-aaral ng kolehiyo, gayundin ang konstitusyon at budget proposal ng pahayagan.
Mula nang itatag noong 1978, hindi pa rin opisyal na kinikilala ng administrasyon ng UP ang TNP bilang pahayagan ng mga mag-aaral ng CMC.
Kasalukuyang binubuo ng 912 undergraduate at graduate na mga estudyante ang CMC. Kakailanganin ng TNP ang mayorya nito, o higit 450 botong pumapabor para tuluyan itong kilalanin ng UP Board of Regents (BOR) bilang isang opisyal na pahayagan ng kolehiyo.
Sa isang open forum sa CMC Auditorium noong Lunes, inihayag ni Kyle Angelo Cristy, punong patnugot ng pahayagan, na “in spirit” lamang ang pagkakakilanlan sa TNP sa mga nagdaang taon.
“Given sa mga estudyante na ni-re-recognize ang Tinig ng Plaridel sa ginagawa nitong pagbabalita and its operations. Pero nung nagkahanapan na ng dokumento na nagsasabi na TNP talaga ang official student publication ng Mass Comm, doon nagkaproblema dahil wala pala,” ani Cristy.
Kawalan ng pondo at proteksyon sa mga miyembro ng TNP ang katumbas ng hindi pagkilala ng UP sa pahayagan.
Sinubukan din ng mga nagdaang patnugutan na magkaroon ang pahayagan ng sariling UP mail ngunit hindi rin ito natupad sa kalaunan bunsod ng kawalan ng dokumentong nagpapatunay na TNP ang opisyal na pahayagan ng kolehiyo.
“From there, na-realize din namin na kapag wala [kaming] binding document or wala [kaming] tangible document na nagsasabing officially recognized ang TNP as a student publication ng college, hindi rin sure yung mga mechanisms ng publication to sustain its funding and operations,” ani Karmela Melgarejo, tagapamahalang patnugot ng TNP.
Nahaharap din ang pahayagan sa kawalan ng sapat na pondo mula sa unibersidad. Para mapanatili ang operasyon, umaasa lamang ang TNP sa donasyon mula sa mga alumni nito at napapanalunang premyo mula sa mga paligsahang sinasalihan ng kanilang mga miyembro na boluntaryong ibinibigay sa pahayagan.
Bunga nito, nahihirapan ang TNP na tiyakin ang kaligtasan ng mga miyembro ng pahayagan. Noong 2023, inulan ng atake ang online platforms ng TNP nang paratangan ng isang blogger ang mga patnugot ng pahayagan ng “destroying evidence” at “obstruction of justice” matapos tanggalin ng Facebook ang kanilang video. Naibalik din kalaunan ang video.
Sa parehong pagtitipon, ipinakita rin ng TNP ang kanilang budget proposal sa kabuuang P181,300 bawat akademikong taon. Dito, nakalaan ang P5,000 sa website maintenance; P56,000 sa pagkain at pamasahe; P97,300 sa honoraria ng mga staff; at P15,000 sa mga kagamitan.
Para matiyak na maayos ang paggamit ng pondo, ayon kay Cristy, maglalabas ang TNP ng financial report nito bawat katapusan ng semestre.
“Ipagpatuloy yung laban na palakasin yung tinig ng mga sangkaestudyantehan, ng mga marginalized sectors at yung masang Pilipinong pinapatahimik at dinadahas […] Kasi yung pagtaya ninyo sa amin ay pagtaya rin sa isang peryodismong kritikal sa pagpapanday ng pagpagbabago sa lipunan at pagtaya rin sa midyang malaya at mapagpalaya,” ani Guinevere Latoza, dating katuwang na patnugot ng TNP.
Hanggang Biyernes maaaring bumoto ang mga kasalukuyang mag-aaral ng CMC sa link na ito: tinyurl.com/TNPReferendum. ●
